في فيلا رأفت الصياد
كان أدهم يشعر بالغيظ لعدم وجود يارا بالفيلا وذهابها للعمل بصحبة خالد و… -أدهم في نفسه : طبعاااا البيه خالد ماهيصدق يترسم ويعمل فيها الراجل المهم ، خبير الشركة الأول ومدير المجموعة اللي مالوش زي، طبعاااا وتلاقيه كل شوية تعالي يا يارا ، عاوزك يا يارا ، خلصيلي الورق ده يا يارا ، وكل ده على عينك يا تاجر ومحدش هيقدر يقوله تلت التلاتة كام ، طيب وماله ، ده أخر يوم ليك معاها يا خالد ، ومن بكرة انا اللي هاقوم بدور المدير عليها .. وزي ما انت شوفت نفسك معاها يومين ، أشوف أنا كمان نفسي عليها .. بص أنا هفضل أعد كده دماغي تودي وتجيب ، وليه أستنى لبكرة ، طب ما أنا أروح الوقتي وأشوف بنفسي ايه اللي بيحصل هنا !!!
وبالفعل ارتدى أدهم ملابسه بسرعة ، ثم اخذ سيارته وانطلق بها نحو الشركة
…………………
في شركة الصياد ،،،
قاربت يارا على الانتهاء من عملها و…
-يارا: ياااااه ، مش مصدقة ، انا قربت أخلص ، الحمدلله
-منير: برافووو
-يارا: بص كده يا استاذ منير وقولي رأيك
-منير وهو ينظر لشاشة الحاسوب: مممم.. فعلاً القوائم شاملة كل حاجة مطلوبة
-يارا: أنا سمعت كلامك يا استاذ منير وكل شوية اتأكد اني عملت save للشغل بتاعي
-منير: الله ينور يا بنتي
-يارا: الحمدلله ، ربنا مش بيضيع تعب حد
-منير: بالظبط ..
ثم فجأة دخل خالد المكتب و…
-خالد: سلامو عليكم
-يارا: انت ؟؟
-منير: أهلا يا بشمهندس خالد ، اتفضل
-خالد: أنا جاي بنفسي أشوف الشغل ماشي ازاي
-يارا: هه
-منير: الشغل ماشي كويس يا بشمهندس ، والآنسة يارا عاملة مجهود الصراحة تشكر عليه
-خالد بابتسامة: عظيم أوي .. احم… اخبار رجلك ايه الوقتي
-يارا وهي تنظر باستغراب للأستاذ منير : هه.. آآآ… الحمدلله
-خالد: طيب تسمحيلي أجي اشوف انتي عملتي ايه
-يارا: أه أكيد ، ثواني بس أقوم وتقعد مكاني
-خالد: لأ خليكي أعدة ، متقوميش من مكانك ، أنا جاي جمبك
-يارا: نعم ؟؟؟
…………………
في نفس الوقت تقريباً وصل أدهم إلى الشركة ، واستعلم من الاستقبال عن مكان يارا و..
-موظف الاستقبال: أدهم باشا ، منور الشركة يا فندم
-أدهم: شكراً ، بقولك اومال يارا الصياد شغالة فين ؟
-موظف الاستقبال : مع الاستاذ منير يا فندم
-أدهم: وفين مكانه ده كمان ؟؟؟
-موظف الاستقبال : في الدور التالت
-أدهم: اوك
توجه أدهم إلى المصعد ليستقله إلى الطابق الثالث حيث توجد يارا ….
……………
في مكتب يارا ،،،،
اقترب خالد من مكتب يارا ووقف ورائها ، ثم مال قليلاً ليرى ما كتبته يارا على شاشة الحاسب الآلي ، فشعرت يارا بالاحراج لاقتراب خالد منها بتلك الطريقة و..
-خالد : ممم.. ده اللي عملتيه ؟؟
-يارا: آآآ… هه .. اه
-خالد: واضح فعلاً انه خد منك مجهود
-يارا: آآ… أها
-خالد: بس الطريقة اللي انتي عملتي بيها القوايم دي سهلة ومبتكرة
-يارا: اها
……….
وصل ادهم إلى الطابق الثالث واستعلم عن مكان المكتب ، وتوجه إليه ، وما إن دلف إلى الداخل حتى رأى خالد وهو مائل على يارا و يتحدثان سويا فـ….
-ادهم: اثبت مكــــــانك
-خالد وقد اعتدل في وقفته: أدهم !!!
-يارا بدهشة: ايه ده ، انت ؟؟
-أدهم: الظاهر اني جيت في وقت مش مناسب ولا حاجة
-خالد: لأ عادي ، احنا كنا بنشتغل
-ادهم: ماهو واضح فعلاً الشغل
-خالد باستغراب : بس قولي انت ايه اللي جابك هنا ؟؟؟
-أدهم: الله مش الشركة ليا فيها أنا كمان ولا محرمة عليا
-خالد: أه طبعاااا ليك فيها ، أنا بس مستغرب وجودك فيها
-ادهم وقد جلس على الكرسي المقابل ليارا : ما أنا قررت انزل أشتغل في الشركة ، ماهو مش معقول أسيبلك انت الشغل كله ، ده حتى مايرضيش ربنا
-خالد: بجد ؟؟؟ ناوي تشتغل معانا
-ادهم: طبعاااااا
-خالد: ده خبر حلو أوي يا أدهم ، والله أنا مش عارف أقولك أنا فرحان بيك أد ايه
-أدهم: اه طبعااااا .. ازيك يا يارا؟
-يارا: كويسة
-ادهم: مش هتوريني بتعملي ايه بقى
-يارا: بعمل العادي بتاعي
-ادهم: مممم… قولتيلي بقى
-خالد: طب يالا بينا يا أدهم احنا ، ونتكلم في المكتب بتاعي فوق
-ادهم: وماله .. ما احنا لازم نتكلم ونتفق
-خالد: طبعااااا… ومنور شركتك يا أخويا ، ها قولت لبابا ولا لسه
-أدهم وهو ينظر ليارا : لأ لسه ، ده انت أول حد جاي أبلغه بده
-خالد: والله العظيم أنا مش مصدق وداني ، ادهم بنفسه جاي يشتغل معانا ، ده الدنيا أكيد حصل فيها حاجة
-ادهم: متستغربش من اي حاجة بعد كده
-خالد: طب يالا بينا احنا ونسيب يارا تكمل اللي وراها
-أدهم: وماله ، نسيبها الوقتي وبعدين نرجع تاني
-خالد: هه..
-ادهم: ماتخدش في بالك ، يالا
كانت نظرات أدهم ليارا تقلقها كثيراً ، كانت تشعر في قرارة نفسها أن وجود أدهم في الشركة سوف يتسبب في المزيد من المشاكل لها و…
-يارا في نفسها: أنا مش مرتاحة لوجود أدهم هنا ، بصاته ليا مش مريحة ع الأخر ، هو مش جاي يشتغل هنا صدفة ،أكييييد العقربة أمه بعتاه هنا ليا عشان يكمل ع اللي ناقصني ، لازم أخد بالي من تصرفاته ، وربنا ينجيني من شرهم كلهم …
……………………..
في مكتب خالد ،،،،،
جلس خالد ليتحدث مع أخيه بشأن عمله في الشركة و…
-خالد: بص يا أدهم ،أنا هجهزلك المكتب اللي جمبي ، عشان تقدر تتواصل معايا لو في أي حاجة انت عاوز تعرفها ، كمان هجيبلك طقم سكرتارية ع الفرازة ، فاهمين شغلهم كويس و..
-ادهم مقاطعاً: أنا عاوز يارا تشتغل معايا
-خالد: نعم ؟؟؟ بتقول ايه
-ادهم: اللي سمعته يا خالد ، بقولك عاز يارا تشتغل معايا
-خالد: ليه ان شاء الله ؟؟؟
-ادهم: هو كده
-خالد: مافيش حاجة اسمها هو كده ، في انها لسه جاية جديد وبتتعلم و..آآآ
-ادهم مقاطعاً: وانت بقى اللي بتعلمها ؟؟؟
-خالد: أه طبعاً ، ومعايا كمان الاستاذ منير و..
-أدهم: وليه أنا كمان ما أعلمهاش ولا ادربها حتى زيك
-خالد: لإن انت لسه جديد في الشغل ، لما تتودك فيه ، ابقى درب اللي انت عاوزه
ثم دلف رأفت إلى داخل مكتب خالد ليتفاجيء بوجود أدهم بداخله ، فظن أن هناك مشكلة ما و…
-رأفت: خالد بقولك انا عاوزك تعملي آآآآ…. ايه ده أدهم ؟؟
-أدهم: أهلا يا بابا
-رأفت: خير يا بني ؟؟ ايه اللي جابك هنا ؟؟ في حاجة حصلت في البيت ؟؟؟ أمك كويسة وعمر كويس ؟؟؟
-ادهم: اه يا بابا ، مافيش حاجة حصلت ، كلنا بخير
-رأفت: الحمد لله ، بس انت جاي ليه هنا ؟؟ عاوز فلوس ؟؟؟
-أدهم: لأ ..
-خالد: مش هتصدق يا بابا أدهم جاي ليه
-رأفت: ليه
-خالد: أدهم قرر انه ينزل يشتغل معانا في الشركة
-رأفت بفرحة : انتو بتتكلم جد
-أدهم: ايوه يا بابا ، وأنا جيت بنفسي أقولك ده
-رأفت وهو يحتضن ابنه: حبيبي يا أدهم ، والله فرحتني أوي ، ده أنا كنت مستني اليوم ده من زمان ، يااااااه ، اخيرااااا .. نورت شركتك يا بني
-أدهم : شكراً يا بابا
-خالد: بس أدهم يا بابا عاوز يارا تشتغل معاه
-رأفت: وماله
-خالد: نعم ، طب ازاي ؟؟
-رأفت: الله مش بنت عمكو
-خالد: يا بابا دي لسه بتتعلم ، وادهم لسه جديد ع الشغل ، وآآآ…
-رأفت: وماله يتعلموا سوا
-أدهم بفرحة: الله يخليك يا بابا
-خالد: ده هي مبقالهاش يومين بتتدرب وآآآ
-رأفت مقاطعاً: خلاص يا خالد زي ما بتدرب يارا درب رأفت بالمرة
-أدهم: اهو ده الكلام
-خالد: اوووف
-أدهم: يا سلااااااااام ، اهو كده الواحد يجي ونفسه مفتوحة عليه
-خالد: طيب ماشي يا بابا ، أنا هدرب الاتنين سوا بس من أول الأسبوع
-رأفت: اوك
-أدهم: وليه مش من الوقتي ولا من بكرة حتى ؟؟؟
-خالد: اكون جهزت المكاتب ليك وليها وظبطت الدنيا ، وبعدين احنا اليومين الجايين مش فاضيين عندنا اجتماع الوفد الألماني وده مهم جدا
-رأفت: ماشي يا بني ، اللي تشوفه مناسب أعمله
-ادهم: وماله ، وانا لحد ما تجهز المكاتب هاقعد معاك هنا
-خالد: هنا فين ؟؟
-أدهم: في مكتبك ده .. !!!!
-خالد:كمان
-رأفت: وماله ، انتو الاتنين واحد .. شوفوا ايه المناسب واعملوه ، انتو مش متخيلين فرحتي النهاردة أد ايه وعيلتي كلها بتشتغل معايا في الشركة
-أدهم: اها
-خالد: ربنا يجمعنا دايماً
-رأفت: يا رب أمين .. امكم اكيد هتفرح الوقتي
-أدهم: من جهة هتفرح هتلاقيها عاملة بارتي
-خالد: تريقة دي ولا ايه
-أدهم: طبعاااااا .. دي اتجننت لما عرفت اني نازل اشتغل
-رأفت: ليه ، مش هي كان نفسها تنزل تشتغل معايا من زمان ؟؟؟
-أدهم:أه ، بس مش في وجود آآآآ… يارا !
-رأفت: يوووه ، برضوه يارا ، أنا مش عارف عملالها ايه يارا
-خالد: هي ماما مش من النوع اللي بيتقبل أي تغيير بالساهل
-رأفت: يارا مش مجرد تغيير ، دي انسانة وبنت أخويا اللي ضىحى بنفسه عشاني وآآآ…
-خالد: مش فاهم ؟؟
-رأفت: هه آآآآ أنا أقصد يعني آآآ.. يعني مش معقول هرمي بنت أخويا في الشارع عشان فريدة مش عاجبها ده
-أدهم: أها …
-رأفت: المهم قولي يا خالد ، يارا عاملة ايه الوقتي ؟؟؟
-أدهم: ليه هو مالها
-خالد: الحمدلله أحسن ، الدكتورة طمنتني عليها
-ادهم: ماحد يفهمني في ايه
-رأفت : اتزحلقت وهي جاية لخالد ، فكتر خيره عملها اسعافات أولية في رجلها وآآآ…
-أدهم: اسعافات أولية ، ماشاء الله ، وايه تاني ؟؟
-خالد: يا بابا أنا معملتش حاجة
-أدهم: كماااان ليه معملتش ، وماخفي كان أعظم طبعاً
-رأفت: بس برضوه ، انت اهتميت بيها وده شيء كبير عندي
-خالد: أي حد في مكاني كان عمل كده ، ويارا غالية عندي آآآ…قصدي عندنا كلنا
-ادهم: يا حنين
-رأفت: تسلميلي يا بني ، أنا مروح ها هتيجوا معايا ولا أعدين ؟؟؟
-خالد: أنا أعد شوية ، لسالي كام حاجة عاوز أخلصها
-رأفت: تمام .. شوف يارا لو خلصت ابقى هاتها معاك
-خالد: اوك
-رأفت: سلام يا ولاد
خرج رأفت من المكتب بينما ظل أدهم وخالد يتحدثان قليلاً عن العمل ثم قرر أدهم الانصراف و…
-خالد: ها فهمت هتعمل ايه
-أدهم: مش أوي
-خالد: واحدة واحدة وهتتعلم ، متقلقش
-أدهم وقد وقف في مكانه : ان شاء الله
-خالد: انت هتعمل ايه الوقتي ؟؟
-أدهم: أنا ماشي ، كفاية عليا كده النهاردة
-خالد: أوك، بكرة ان شاء الله نكمل
-أدهم: اه بالمناسبة ..
-خالد: ايه؟
-أدهم: أنا هوصل يارا في طريقي
-خالد: نعم ؟؟؟
-ادهم: يعني البنت رجلها وجعاها ، هسيبها تتبهدل في المواصلات
-خالد: لأ .. بس انا كنت آآآآ…
-ادهم : سلام يا اخوياااااا………………………….
رواية الفريسة والصياد.
بقلم منال محمد سالم.
الحلقة الثانية والثلاثون :
في شركة الصياد ،،،
نزل أدهم إلى مكتب يارا بالطابق الثالث ليقلها معه إلى الفيلا ولكن كانت المفاجأة أنها ليست بالمكتب و…
-أدهم وهو يبحث بعينيه عن يارا: الله !! اومال فين يارا ؟؟؟؟
-منير: مشيت من شوية
-ادهم: ازاي تمشي كده ؟؟؟
-منير: معاد الانصراف بتاعها جه
-أدهم: طيب هي نزلت من بدري ؟؟؟؟
-منير: لأ هي لسه نازلة من حبة ، ممكن تلاحقها هي أكيد في الريسبشن
-ادهم: ماشي .. شكرااااا
-منير: العفو
…………
توجه ادهم ناحية المصعد ولكنه كان مشغولاُ ، فاضطر لأن ينزل على السلالم مسرعاً إلى الردهة ، وبالفعل وجد يارا موجودة بالأسفل و…
-أدهم بصوت عالي: ياراااااا
-يارا وهي تلتفت : أدهم !!
-أدهم: انتي ماشية كده
-يارا: ايوه ، ميعاد انصرافي
-ادهم: طيب استني أوصلك
-يارا: لأ عمي هيبعت العربية بالسواق وآآآ…
-أدهم: لأ بابا قالي اوصلك
-يارا بدهشة: نعم ؟؟؟
-أدهم: يالا بينا
-يارا: مينفعش على فكرة
-ادهم: هو أنا حد غريب ، وبعدين احنا الاتنين رايحين نفس المكان وعمك اللي قايلي ده ، يعني طريقنا واحد
-يارا: لأ مش واحد على فكرة
-أدهم بخبث: هيبقى واحد واتنين وتلاتة قريب
-يارا: نعم
-أدهم: تعالي بقى قبل ما يجي الرزل البارد
-يارا: تقصد مين ؟
-ادهم: هو في غيره
-خالد من الخلف: سامعك على فكرة
-يارا: خــ… قصدي البشمهندس خالد
-أدهم: بشمهندس !!!
-خالد: كويس اني لحقتك ، يالا عشان هوصلك معايا
-يارا: نعم ؟؟ توصلني
-أدهم: لأ أنا خلاص حجزتها
-خالد: هي تورتة ؟؟؟
-يارا: لو سمحتوا
-خالد: والله أنا بابا قالي كده
-أدهم: وأنا اللي جيت الأول
-يارا : بسسسسس .. أنا مش عاوزة حد يوصلني ، الاستاذ منير هيوصلني في طريقه !!!
-أدهم وخالد: ايييه ؟؟؟
-أدهم: نعم ياختي منير مين ده كمان اللي هيوصلك ؟؟
-يارا: ده رئيسي في الشغل
-خالد: ده على اعتبار ان أنا خيال مآتة مثلاً ؟؟؟
-أدهم:مش فاهم أنا بتاع ايه منير اللي يوصلها
-يارا: على فكرة ده راجل أد بابا الله يرحمه وآآآ…
-ادهم: والله لو اد جدك حتى ماهتركبي معاه !
-يارا: ليه ان شاء الله ؟؟؟ أنا حرة على فكرة
-ادهم: لأ مش حرة !!!
-خالد: ماينفعش يا يارا تركبي مع حد تاني
-يارا: لأ ينفع ، أنا كنت في الغردقة بركب مع زمايلي وبنوصل بعض طالما في سكة واحدة
-خالد: زمايلك اللي هما كانوا معاكي في السنتر الرياضي
-يارا: اها
-خالد بضيق: وجدتك كانت موافقة على ده عادي؟؟؟
-يارا: نوووجة !! الله يرحمها كانت مخلية البيت عندنا كأنه بيت عيلة ، الكل معتبرها جدته ومامته وآآآ
-أدهم وهو يجذبها من ذراعها : لأ أنا مش هاقعد اتحايل عشان تيجي تركبي ، يالا بقى
-يارا متآلمة : آآآآآآآآآآه .. حاسب
-خالد: أدهم .. مش تحاسب يا جدع ؟؟ انت مش شايف رجلها
-أدهم: اووبس ، سوري مخدتش بالي
-خالد: هتاخد بالك ازاي وانت كل حاجة عاوزها عافية وقوة
-أدهم: ما أنا سايبلك انت الحنية كلها
-يارا: ولا تزعلوا نفسكوا أنا هركب معاكو انتو الاتنين ؟؟؟
-أدهم: ازاي ؟؟
-خالد: مش فاهم ؟؟
-يارا: واحد فيكو يسوق عربيته وانا هاقعد في الكرسي الوراني ، ارتاحتوا
-خالد: هو حل كويس
-أدهم: يبقى تاخدوا عربيتي
-خالد : لأ عربيتي
-يارا: أنا بعد كده هاشتريلي عجلة وأبقى أركب مع نفسي
-خالد: نعم ؟؟؟ عجلة
-يارا: أه
-أدهم: وده مين اللي هيسمحلك تركبيها هنا
-يارا: عادي ، أنا كنت في الغردقة بأجر عجل وآآآ…
-أدهم مقاطعاً: يادي أم العمايل السودة اللي عملتيها في الغردقة
-يارا: لو سمحت اتكلم كويس
-خالد: خلاص أنا موافق أركب عربيتك يا أدهم
-أدهم: أخيرا
-خالد: يالا بينا بقى ، كفاية عطلة لحد كده
-يارا: محدش يستعجلني أنا عاوزة أمشي على راحتي ، مش ناقصة حد يستعجلني
-خالد: ماشي
-ادهم: يا مهون
بدأت يارا تمشي بخطوات بسيطة ومتمهلة مما سبب الضيق لخالد وأدهم ، فقرر خالد أن …
-خالد: لأ كده احنا مش هنوصل ولا الفجر
-يارا: الله ! مش ع أد امكانياتي
-خالد لأخيه أدهم : خد امسك الشنطة دي وهات عربيتك بسرعة
-أدهم باستغراب : ليه ؟؟؟
-خالد : عشان هشيل الهانم
-أدهم : نــــــــــــــعم ؟؟؟؟؟
-يارا: ايييييه ؟؟؟
بالفعل قام خالد بحمل يارا مرة أخرى بين ذراعيه ، بين ذهب أدهم ليحضر السيارة وهو غاضب ومتجهم الوجه و…
-يارا: ع فكرة انت بوظت صورتي خالص باللي بتعمله ده
-خالد وهو يحملها : أنا المدير
-يارا: وده يديك الحق انك تعمل كده ؟؟؟
-خالد بابتسامة : طبعاااااا
-أدهم بغل : ماشي يا خالد ، ماااااشي !!!!!!
أحضر ادهم سيارته ، ثم جلست يارا في المقعد الخلفي ، بينما جلس خالد بجوار أدهم الذي القى في وجهه حقيبته و…
-ادهم وهو يلقيه بالحقيبة : خد
-خالد: ايه يا عم ما بالراحة
-ادهم: ده العادي بتاعي !!!
…………………
في فيلا رأفت الصياد ،،،،
قاد أدهم السيارة إلى الفيلا ، وما إن وصل إلى هناك حتى ترجل منها ، وأسرع بفتح الباب الخلفي للسيارة وحمل يارا وسط ذهولها ودهشة خالد ..
-يارا: انت…انت بتعمل ايييه ؟؟
-أدهم: مش هو شالك في الشركة ، ده دوري بقى هنا
-يارا: والله ما ينفع اللي انتو الاتنين بتعملوه
-أدهم: ينفع بقى ولا ماينفعش ، ده دوري
-خالد: استغفر الله العظيم ، هي لعبة ولا ايه ؟؟؟
دلف أدهم إلى الفيلا وهو يحمل يارا ، وتفاجئ بوجود شاهي مع والدته فريدة و…
-شاهي بدهشة: ايه اللي أنا شايفاه ده ؟؟
-يارا: يا فىضيحتي ، نزلني
-أدهم: لأ
-فريدة: أدهـــــــــــم !!! انت بتعمل ايه ؟؟؟
-أدهم: عادي يا فيرووو
-شاهي: انت… انت ازاي داخل الفيلا و..وهي معاك بالمنظر ده
-أدهم: ايه مش شايفة رجلها يا شاهي
-شاهي لفريدة: أنطي فيرووو !! يرضيكي اللي بيحصل ده
-خالد من الخارج بصوت عالي : خلاص ارتحت كده يا أدهم لما شلتها ، بقينا متعادلين في نظرك
-فريدة: اييه ؟؟
-خالد: ماما
-فريدة: ايه اللي بسمعه ده ؟؟؟؟؟؟؟
-خالد: آآآ… شاهي … ازيك
-يارا: نزلني بقى، كفاية كده الناس كلها اتلمت
أنزل أدهم يارا ، بينما نظرت لها شاهي بنظرات حقد وغضب ، تراجعت يارا للخلف في محاولة منها للابتعاد عما يحدث من مواجهات ، بينما صاحت فريدة بــ…
-فريدة: طبعااااااااا .. الهانم مش مضيعة وقتها، شغالة على ولادي الاتنين ، ماهي دي وظيفتها الوقتي ، ازاي توقع ولادي فيها وتلعب عليهم !!!!
-خالد بحدة: ماما .. مافيش داعي للكلام ده
-أدهم: في ايه اللي حصل لكل ده
-فريدة: بتسألني في ايه ، وأنا شايفاك داخل عليا وشايل الهانم في ايدك ، وقبل كده جايباها من على سىريرك
-شاهي: ايييه ؟؟ سىريره
-خالد: ماما ، اللي بتكلمي عنها دي بنت عمنا ، مش واحدة من الشارع
-أدهم: فريدة هانم ، من فضلك متدخليش في اللي بعمله ، وأنا قبل كده قولتلك وقدامها لو عاوز أتجوزها هتجوزها ومافيش حد هيمنعني
-شاهي: تتــ….تتجوزها ؟؟؟
-فريدة: أدهم
-خالد: نعم ؟؟؟ تتجوز مين ؟؟؟
-يارا في نفسها : بيتهيألي أخىلع أنا من هنا ، بدل ما أمه تغتالني وأنا واقفة كده .. ده وشها جاب كل الألوان
انسحبت يارا دون ان يشعر بها أحد ، فتفاجئت بوجود عمر خلفها و..
-عمر من الخلف: يارا ! ايه اللي حصل لرجلك ؟؟
-يارا: اصابة عمل ، يالا بس بينا من هنا لأحسن أمك في حالة فوران دلوقتي
-عمر: ماشي
أسند عمر يارا ثم توجه بها نحو السلم و..
-عمر: ايه الموبايل الكوهنة اللي معاكي ده
-يارا وهي تنظر لهاتفها : ماله ، ماهو شغال أهوو وحلو .. وبعدين ده حمار شغل مايقولش لأ أبدا
-عمر: يا سلام
-يارا: طبعاً ، وبيستحمل كتير ، ياما وقع مني وماتك.سرش
-عمر: للدرجادي
-يارا: أه وأكتر كمان
-عمر: ماشاء الله
كان صوت صراخ فريدة عالياً و…
-فريدة: يعني مش كفاية انك قررت تنزل الشغل عشان بس لما عرفت ان الزفتة دي راحت
-أدهم: ماما متقوليش عليها زفتة
-خالد: اسمها يارا يا ماما
-شاهي: يعني روحت تشتغل عشانها ؟؟؟؟؟
-فريدة: سنين بتحايل عليك تنزل تشتغل وانت مكبر دماغك وبس الوقتي الشغل عجبك
-أدهم: يوووه ، يعني قعادي في البيت مش عاجب ، نزولي مش عاجب ، اعمل ايه يعني عشان يرضيكي
-فريدة : تبعد عن سكة الهبابة دي
-ادهم: مش هابعد
-خالد: ماما اسمها يارا وهي بنت عمنا ، ارجوكي تقبلي الأمر ده عشان نرتاح كلنا
-فريدة بصوت عالي: ولادي بيعصوا كلامي ، وكله عشان خاطر ميييين ، الزفتة بنت الشغالة دي !!!!!!!
لم تتحمل يارا الاهانة ، فقامت بالقاء هاتفها المحمول على رأس فريدة الرفاعي مما سبب لها الآلم ثم ارتد الهاتف على الأرض ليتحطم إلى أجزاء ، فالتفتت فريدة لترى ما الذي أصابها و…
-فريدة متآلمة : آآآآآآآآه
-يارا من بعيد: سوري ياخالتي ، الموبايل فلت من ايدي
-فريدة: آآآه يا بنت الـ …
-عمر بدهشة: فلت ازاي وانتي… آآآآآه
-يارا وهي تضغط على يده : والنبي يا عمر اسندني لأوضتي لأحسن مش قادرة أدوس على رجلي خالص .. آآآه يا رجلي ياااني ، آآآه
-فريدة: عمــــــر !!!!!!
-عمر: معلش يا ماما ، هي محتاجة مساعدتي الوقتي
-فريدة بغيظ: حتى انت !!!!!!!!
-أدهم في نفسه: يا بن المحظوظة ، رايح معاها أوضتها !!!
-شاهي: ادهم ، من فضلك عاوزاك شوية
-أدهم بضيق : ايييه ؟؟
-شاهي : تعالى معايا
-ادهم: طيب
-فريدة: شايف، دي اللي بتدافعوا عنها ، بتحدفني بالموبايل وانتو واقفين تتفرجوا عليا
-خالد: ماهي قالتلك وقع من ايدها
-فريدة بحنق: وقع ازاي وأنا المسافة بيني وبينها أد كده
-خالد: يمكن الهوا كان جامد ولا حاجة
-فريدة: خــــالد
-خالد: ماما ، أنا طالع أغير هىدومي
ترك خالد والدته وهي تغلي من الغضب ، فرأت هاتف يارا المحطم على الأرض فداست عليه بقدميها بكل قوة وغل و…
-فريدة وهي تدوس على هاتف يارا المحطم: والله لأك.سرك زي الموبايل البيئة بتاعك ده ، مش هاسيبك غير لما اذمرك .. مهما كنتي بتحاولي تستغفلي عيالي ، أنا مش هديكي الفرصة لده ..!!!!
أوصل عمر يارا إلى غرفتها و..
-عمر ليارا: يخرب عقلك ، ده ماما هيجرالها حاجة من اللي عملتيه
-يارا: لأ أطمن ، امك من النوع اللي بيستحمل
-عمر: أها .. بس موبايلك اتك.سر خالص
-يارا: والله طول عمره كان بيستحمل خبطات أكتر من كده ، بس دماغ أمك هي اللي كانت ناشفة عليه ……………………………… !!!
………………………….
